Hutt Dir schonn eng Kéier eppes vum Douzelage héieren? Den Douzelage ass eng Jumelage Kooperatioun, déi aktuell aus 27 Partnerstied besteet an d’Zil huet, d’Chancen an d’Frëndschaft a ganz Europa duerch en touristeschen, sportlechen, bildungspoliteschen, kulturellen a sozialwirtschaftlechen Austausch ze fërderen. D'Gemeng Nidderaanwen ass Grënnungsmember vum Douzelage. 1991 huet d'Gemeng, zesumme mat 11 anere Partner d’Jalone fir en neien an eenzegaartege Jumelage gesat.
Op dëser Säit fannt Dir all d'Informatiounen iwwert den Douzelage, sou wéi iwwert d'Aktivitéite vum 2023 gegrënnten Douzelage Team.
Besicht och d'Internetsäit www.douzelage.eu.
1993 kritt den Douzelage eng vun deene renomméiersten Unerkennungen am Beräich vun den europäesche Jumelagen: "Etoiles d'Or du Jumelage". Am Moment zielt den Douzelage follgend Memberstied:
Agros (Zypern), Altea (Spuenien), Asikkala (Finnland), Bad Kötzting (Däitschland), Bellagio (Italien), Bundoran (Irland), Chojna (Polen), Granville (Frankräich), Holstebro (Dänemark), Houffalize (Belsch), Judenburg (Éisträich), Köszeg (Ungarn), Marsaskala (Malta), Meerssen (Holland), Niederanven (Groussherzogtum Lëtzebuerg), Oxelösund (Schweden), Preveza (Griicheland), Rokiškis (Litauen), Rovinj/Rovigno (Kroatien), Sesimbra (Portugal), Sherborne (Groussbritanien), Sigulda, (Lettland) Siret (Rumänien), Škofja Loka (Slovenien), Sušice (Tschechesch Republik), Tryavna (Bulgarien), Türi (Estland), Zvolen (Slovakei).
D'Douzelage Team
Zil vum Team ass et, déi europäesch Städtepartnerschaft, den Douzelage, oprechtzeerhalen an eis Gemeng ze representéieren. D'Team plangt an organiséiert déi domat verbonnen Aktivitéiten oder kënnt mat neien Iddien heifir. Dozou gehéiert och d'Preparatioun vum General Meeting, bei deem sech all d'Partnerstied eemol am Joer treffen. De kulturellen, touristeschen, sportlechen, bildungspoliteschen a socio-ekonomeschen Austausch am Kader vum EU-Programm steet natierlech och op der Dagesuerdnung vum Team.
v.l.n.r.: Hon Pan Luk, Marion van Alphen, Uli Fielitz (Koordinator), Manon Sowa, Dietmar Dumlich, Laura Gaul (Sekretärin), Jil Steyer, Pierre Welter, Lynn Klein (absent: Josselijn de Vries (Schäffin), Danielly Kaufmann, Georges Paquet).
Aktivitéiten am Kader vum Douzelage
Siwe Representante vun der Gemeng Nidderaanwen ware lescht Woch am Kader vum Douzelage um General Meeting zu Sherborne. Ënnert dem Thema ,,Wuelbefannen duerch Musek an Natur'' goufe Konferenzen, Workshops a Konzerten organiséiert an eis Ekipp ass mat villen neien Iddie fir eis Gemeng zréckkomm.
Wärend der Generalversammlung mat den Delegéierte vun all de Partnerstied gouf dëst Joer dann och en neie Conseil d'administration gestëmmt. Merci un d'Annigje Kruytbosch, den Tibi Rotaru, d'Mette Sørensen an dem Miha Ješe fir déi wonnerbar Aarbecht déi lescht Joer. Dem neie Conseil mam Shane Smyth, dem Thorsten Wohleser, dem Maria Črnac Rocco an dem Evelin Koev wënsche mir eng glécklech Hand an hirer neier Fonktioun.
Dem Team vu Sherborne soe mir e grousse Merci fir hir häerzlech Begréissung an déi exzellent Organisatioun!
© Fotoen: Gemeng Nidderaanwen & Uli Fielitz Photography
De Samschden, 23. Mäerz, hate mir zesumme mat eisem Douzelage Team déi grouss Freed, eis Frënn vum Douzelage Meerssen an Douzelage Houffalize op de BeNeLux Meeting bei eis an der Gemeng anzelueden.
Wärend der Konferenz um Mueren gouf iwwer aktuell Douzelage-Projeten, sou wéi den General Meeting am Abrëll zu Sherborne, geschwat an sech iwwer nei Iddien ausgetosch, fir d'BeNeLux-Relatiounen mat konkrete Projeten nach méi ze stäerken. D'Mëttegiessen am CIPA Gréngewald hu mir mat enger Visitt vum Gebai, souwéi mat enger Féierung duerch d'Cogeneratiounanlag Am Sand kombinéiert. Schliisslech gouf als kréinenden Ofschloss vum BeNeLux Meeting eise fonkelneien Douzelage Totem virum Gemengegebai ageweit.
Mir soen eise Frënn vu Meerssen an Houffalize e grousse Merci fir dee flotte Besuch.
Ënnert dem Numm ,,Free Press under Pressure'' (FPuP) hu 70 jonk Erwuessener aus 19 EU-Memberstaaten no Weeër gesicht, fir faktuell richteg an iwwerpréiften Informatioune vu Fake News ze ënnerscheeden. De Projet gouf vum Douzelage Meerssen an Zesummenaarbecht mat der Fontys University of Applied Sciences, der Universitéit Maastricht, der United Nations University (UNU-MERIT), dem Douzelage Köszeg an dem Douzelage Siret organiséiert. D'Participanten hunn a siwe Workshops un der Entwécklung vun engem Toolkit, deen zur Bewäertung vun News an Informatiounen benotzt ka ginn, geschafft an hu sech géigensäiteg hir Resultater virgestallt. D'Resultater goufen zesumme mat den Toolkrits vun de Jugendlechen op der Internetsäit fpup.douzelagemeerssen.nl verëffentlecht.
Dräi jonk Fraen an eng Vertriederin vun der Gemengeverwaltung vun Nidderaanwen hunn un der Konferenz, déi de 5. bis 8. November 2023 stattfonnt huet, deelgeholl. Den Openthalt gouf mat ville flotten Aktivitéiten an Ausflich kombinéiert, ënner anerem mat engem Besuch vum Gouvernement vun der Provënz Limburg zu Maastricht.
No engem Opruff op eise sozialen Netzwierker and op eiser Internetsäit hate mir d'Méiglechkeet, vum 28. September bis 1. Oktober 2023, fënnef offiziell Delegéierter op den General Meeting zu Rovinj/Rovigno a Kroatien ze schécken. Den General Meeting, deen eigentlech eng Assemblée générale ass, bei deem d'Delegéierter vun all den Douzelage Memberstied d'Joer Revue passéiere loossenm zeechent sech och duerch seng sëlleg Workshops an Aktivitéiten zu engem konkreten Thema aus.
Fir den neie Schäfferot vun Nidderaanwen kennenzeléieren, huet eis d'Präsidentin vum Douzelage Europe, d'Madamm Annigje Kruytbosch de 16. August 2023 besicht an eis an Engems eisen Zertifikat fir 30 Joer Memberschaft am Douzelage als Grënnungsmember iwwerreescht.
Gitt och Dir Deel vun der Douzelage-Famill!
Dir wëllt nei Stied entdecken, Frëndschafte schléissen an eis Gemeng am Ausland representéieren? Da mellt Iech iwwert dëse Formulaire fir d'Douzelage Team un a gitt Deel vun der grousser Famill vum Douzelage Europa!
