Gemengewalen 2023

Fir dem ofgeännerte Walgesetz vum 18. Februar 2003 ze entspriechen an no enger Kommunikatioun vum Inneministère wäerten d’Walbüroen ab den nächste Gemengewalen, den 11. Juni 2023, nei organiséiert ginn. D’Gesetz gesäit vir, dass an all Walbüro mussen tëschent 300 a 600 Wieler ageschriwwe sinn an, dass et net erlaabt ass en Duerf an zwou Wallokalitéiten opzedeelen. Aus dëse Grënn, a well d’Unzuel vun der Bréifwal ëmmer méi an d’Luucht geet, huet de Gemengerot decidéiert, dass d’Walbüroen an den Uertschaften Ueweraanwen an Nidderaanwen sollen zentraliséiert ginn, fir d’Organisatioun vun de Walen ze erliichteren. D’Wieler aus den Uertschaften Nidderaanwen, Sennéng a Sennéngerbierg wäerten zu Nidderaanwen wielen an déi aus Iernster, Hueschtert, Ueweraanwen, Rammeldang a vum Waldhaff zu Ueweraanwen. D’Gemeng wäert Iech eng Navette zur Verfügung stellen, fir Iech bei Äre Walbüro ze bréngen.

Mat der Navette an de Walbüro.
Profitéiert vun eisem praktesche Service um Walsonndeg a loosst Iech den 11. Juni an de Walbüro féieren. 
Den Horaire fannt Dir hei drënner an deemnächst an Ärer Boîte!

Horaire Navette Walsonndeg

Et ass Iech net méiglech den 11. Juni 2023 perséinlech an Äre Walbüro ze kommen? An dësem Fall kënnt Dir Iech fir d’Bréifwal decidéieren! D’Demande kënnt Dir elektronesch iwwer myguichet.lu oder iwwert e Formulaire maachen, den Dir op der Gemeng kritt, an dat fréistens ab dem 20. Mäerz 2023 a spéitstens bis den 2. Mee 2023 (Envoi an d’Ausland) oder de 17. Mee 2023 (Envoi a Lëtzebuerg). Ausserdeem ass decidéiert ginn, dass d’Gemeng d’Käschte vum Renvoi vun der Bréifwal iwwerhuele wäert!

Formulaire fir d'Bréifwal unzefroen 

Ginn et Themaen, déi Iech um Häerz leien? Wëllt Dir fir Verännerunge suergen an Ärer Stëmm gehéier verschafen? Dann drot Iech elo op d'Wielerlëschte fir d'Gemengewalen, den 11. Juni 2023, an an engagéiert Iech fir Iech selwer, fir Är Famill an d'Zesummeliewe vun de Bierger an der Gemeng Nidderaanwen. Aschreiwe kënnt Dir Iech nach bis de 17. Abrëll 2023 op der Gemeng oder iwwer MyGuichet!